Aloha ino

Aia i ke aumoe o keia po, i ka moena ma ka lumi o ka‘u wahine au e hoopaahaawina ana no kekahi hoike e hiki mai ana, a lohe ia aku nei ka ue hauhau a kahi kaikamahine (ke kaikaina no hoi o ka‘u wahine) e paa mai ana kana wahi iole kawia ma ka lima, me ka ue ana aku "Ua mai mai nei no hoi paha o Piku, aole e hanu ana me ka maikai, he hauhau wale no." I nana aku ka hana, aole o kana mai ka minamina o kana mea e hoike mai nei. Ua pukui ka iole kawia ma ka poli o ke kaikamahine, e iimo ana ka maka, e huki ana ke kino, e keke ana ka niho, me he mea la, loaa oia i ka mai huki. Ua maopopo ia‘u i ia manawa, aohe paha mea hiki ke hana aku, ua hiki mai kona wa e haule ai a moe i ka moe oni ole a Niolopua.

I ke kakahiaka nei, ua hele aku ua kaikamahine nei e hanai i ka holoholona a hoopiha hou i kana ipu wai i ka wai, e like me ka hana mau, aka, aole loa i ike ia hookahi wahi hoailona o ka mai. I loa no a waiho ia ka ai i loko o ka pahu holoholona, puka aku ka iole i waho o kona hale palanaiki a holo kukini mai no a ai iho i ke kelaki. Aloha akula ke kaikamahine i ka iole a hoi mai i loko o ka hale, aole o ia i mahui e ike i ka pau koke ana o ke olakino i hookahi wale no la.

Ua lohe mai na makua i ka ue haalipo o keia kaikamahine, no laila, ua hele mai laua me ka manao e ike i ka pono o ka hanaiahuhu, a hooluolu no hoi i ka naau o ke kaikamahine. Mea mai ka makuahine, aohe ona hewa, aka, ua hoea mai no ka wa e hala ai. Olelo pu mai ka makuakane, ua luahine mai nei ka iole, ua piha ia ia eha mau makahiki, he ola loihi a kupono no kona, aka, ua hooholo Ke Akua e hoi aku o ia ia ia ala. Aole nae i hooku ia mau olelo i ka mokumokuahua o ua kaikamahine nei, a me na kulu waimaka e heleawai iho ana ma ka papalina.

Ke hoomanao mai nei keia mea ia‘u e pili ana i ku'u ilio aloha i hala akula i ka mai aai. I kona mau la hope loa, ua kaumaha maoli o loko ke nana aku i kona ehaeha ana i ka mai. I kona ike ana mai ia‘u, oehaa mai nei i ko‘u aoao, kohu mea la, ua nawaliwali mai nei, aka, o ka mea nui i kona manao ka hoike ana mai i kona aloha no'u. Hoao wau e hanai ia ia, aka, ua luai mai. Ua hoao wau e haawi aku ia ia i ka wai, a ua inu no a kena, me he mea la, aa ka puu i ka makewai, a laila, ua luai hou a hina ke kino i ka lepo. Noho pu au me ia ma ka lepo, o ka helelei maoli no ia o ko‘u mau waimaka i ka minamina i ku'u wahi ilio, ku'u hoa kupaa i ka inea. Ia ia nei i ike mai ai i na hoailona o ka hopohopo ma ko‘u maka hupe, o ke aea aela no ia o ke poo a nana oluolu mai. Me ka ikaika i koe, hoomaha i ke poo ma ko‘u uha, kohu mea, aohe ona noonoo no kona ehaeha ponoi, aka, ua makemake mai o ia e hoomama i ko‘u naau. Keu a ke kolokolohai lokomaikai o ku'u ilio. Ma ko‘u aoao o ia kahi i moe iho ai a hiki i ka manawa i hooholo ia ai, e aho makou e hoopau i kona ehaeha ana i na kipona o ka mai, a hoihoi aku ia ia i ka poli o Ke Akua. Ua hapai ae ko‘u makuahine ia ia a waiho ma ka hope o ke kalaka, a kalaiwa akula i ke keena kauka, kahi i pili hope loa iho ai kona mau maka oluolu a moe i ka moe kau a hooilo.

Aole no i oi loa aku ko‘u mau makahiki i kela manawa ma mua o ke kaikamahine i olelo ia ma luna nei. No laila, maopopo ia‘u kela ano kuhohonu o ke kaumaha o ka naau.

(Pai mua ia ma ka Poakahi nei)